Que duros son os cambios...

Fernando García Páez do CEIP San Walabonso (Niebla-Huelva) estivo onte no noso centro dando unha lección REAL de como empregar as TICs nas aulas. Á maioría dos que alí estabamos animounos á emprender o camiño, pero quedan moitos por convencer. Para eles vai dedicada esta presentación que nos ensinou e ca que rimos moito.

| View | Upload your own

Grazas Fernando

Tecnoloxía ou metodoloxía?

Aquí tedes un vídeo que vin neste blogue e que resume moi ben que sen metodoloxía e proxecto pedagóxico, non fai demasiada falta a tecnoloxía.



Que opinades?

Exemplo dunha busca do tesouro

Amósovos un exemplo dunha busca do tesouro sobre Trastornos Alimenticios

Busca (ou caza) do tesouro

Trátase de algo tan sinxelo como unha folla de traballo ou unha páxina web cunha serie de preguntas e un listado de direccións web nas que os alumnos deben atopar as respostas. Ao final débese incluír a gran pregunta, cuxa resposta non aparece directamente nas páxinas visitadas, se non que require integrar e valorar o aprendido durante a busca. Entre outras cousas permítennos mellorar a comprensión lectora dos alumnos e ensinarlles a buscar información en Internet. Poderiamos situalas nun nivel por debaixo das WebQuest xa que non acostuman a propoñer a resolución de problemas nin a exposición de conclusións finais.

Estructura:

A caza de tesouros pode ser en formato dunha simple folla de papel, pero para evitar que o alumnado teña que teclear as direccións web e así poder gañar tempo, é recomendable que sexa en formato de páxina web.

Estructúrase en 6 apartados:

- Introducción

Dalle ao alumno a información inicial da actividade, e nela describirase a tarefa e as instrucción para levala a cabo. Debemos motivar e despertar o interese amosándoa atractiva e divertida.

- Preguntas:

Faremos un listado numerado de preguntas a contestar. Dependendo da idade do noso alumnado poden ser:

• Preguntas directas: Para formulalas deberiamos copiar frases exactas que conteñen a información relevante que queremos que atopen e logo transformalas en preguntas directas. (Para os alumnos máis pequenos)
• Preguntas que impliquen actividades máis complexas: Preguntas relacionadas coa lectura comprensiva, a inferencia, a reunión e organización de información, a comparación, etc. Se plantexamos pequenas actividades deben poder resolverse con certa rapidez.

As preguntas poden ser:

De Análise: Por que as cousas ocorren do xeito que o fan?

Solución de problemas: Como poden facerse mellor?

Toma de decisións: Que opción debo escoller?

- Recusos:

Consisten nun listado de webs que o profesor localizou previamente para axudar ao estudante a respostar ás preguntas realizadas. Ao alumnado máis pequeno é convinte poñerlle o enlace necesario para resolver cada pregunta a continuación da mesma.

- A gran pregunta:

É recomendable, sobre todo, para alumnos máis maiores. Trátase de incluír unha pregunta final, goblal, que teña unha resposta que non se atope inmediatamente en ningunha das páxinas visitadas, se non que dependa das respostas ás preguntas anteriores e do aprendido buscando esas respostas. Deberá coincidir cun obxectivo curricular e pode conlevar a traballar normas, valores e actitudes incluso propoñer opinión personais.

- Avaliación:

Describirase claramente que se valorará e como será valorado. O xeito máis sinxelo de avaliar a caza é en función do producto: orixinalidade, traballo en equipo, manexo da tecnoloxía, grao de elaboración, etc.

- Créditos:

É recomendable facer un listado das fontes empregadas para elaborar a nosa caza.

Comparativa WebQuest - MiniQuest

Neste documento tes as similitudes e/ou as diferenzas entre as WebQuets e as MiniQuest:

Exemplos de Miniquest

Non hai tanta cantidade de Miniquest publicadas como de WebQuest (será pola facilidade en facelas e o efímero do seu emprego)
No apartado phpWebQuest do portal da Consellería de Educación mencionado anteriormente hai varios exemplos.
Aquí tedes algunhas en castelán e nesta outra páxina unha en catalán.

MiniQuest

Consisten nunha versión de WQ que se reducen só a tres pasos. Están pensadas para que os estudantes as realicen completamente no transcurso dunha sesión de 50 minutos. Esto axuda a que se poida inserir con maior facilidade na secuencia curricular dun curso. Ademais esta é unha actividade recomendable cando a dispoñibilidade de ordenadores non é moi ampla.

En liñas xerais pode ser construída por educadores que teñan algunha experiencia no emprego de internet nunhas 3 ou 4 horas.

Tipos de MiniQuest:

A clasificación das MQ susténtase nas distintas posibilidades de incorporalas ao desenvolvemento dunha unidade didáctica, sendo:

• MiniQuest de descuberta: Lévanse a cabo ao comezo dunha unidade didáctica. Están deseñadas para presentar ao alumnado uns contidos concretos.
• MiniQuest de exploración: Realízanse no transcurso dunha unidade didáctica. Está dirixida a aprender o contido necesario para asimilar un concepto particular ou cumprir un obxectivo determinado.
• MiniQuest de culminación: Desenvólvense ao final dunha unidade didáctica. Os estudantes que traballan en elas deben ter unha base de coñecemento porque deben estar en disposición de repostar preguntas moito máis complexas. Estas preguntas esenciais esixen do alumno unha resposta enfocada na toma de decisións ou no desenvolvemento dun plan de acción

As MiniQuest compóñense de tres partes ou seccións:

Escenario:

Establece un contexto real para o proceso de solución de problemas. Ubica aos estudantes nun papel (rol) verdadeiro que desempeña un adulto. Proporciona un "gancho" para meter ao alumno no problema. Ademais establece a pregunta esencial que os estudantes deben contestar.

Tarefa:

Inclúe unha serie de preguntas deseñadas co propósito de adquirir a información obxectiva e real que se require para respostar á pregunta esencial. A tarefa está moi estructurada, porque a actividade debe levarse a cabo en un (ou como moito en dous) períodos de clase. Esta sección dirixe aos estudantes cara a sitios específicos de rede que conteñen a información necesaria para resolver preguntas da tarefa de xeito que a adquisición do "material básico" se faga nun tempo establecido e en forma eficiente.

Producto:

Como o seu nome indica, inclúe unha descrición do que os estudantes van realizar para respostar á pregunta esencial plantexada no escenario. O producto require que os estudantes demostren comprensión. Mediante algunha forma de avaliación do producto, o profesor debe comprobar ese entendemento.
O producto pode requerir unha síntese da información para contruír coñecemento. En outras palabras, os estudantes deben desenvolver un xeito novo de enfocar o problema. Se non se promove a creación de coñecemento entón a actividade será simplemente unha folla de traballo en liña e non o que debe ser, unha actividade de investigación.
Ademais o producto debe ser real e reflectir axeitadamente o rol que se asignou ao estudante no escenario.

phpWebQuest

Dentros dos contidos educativos da Consellería de Educación da Xunta de Galicia existe un apartado no que podemos crear, de xeito bastante doado, WebQuest, MiniQuest ou Busca do Tesouro. Só temos que solicitar previamente unha nova conta de usuario e, unha vez que estemos dados de alta, acceder ao sistema e empezar a empregar unha ferramenta que é bastante intuitiva.
As aventuras na web creadas publicanse e quedan a disposición do profesorado que queira examinalas e/ou empregalas.
Visita o apartado e consulta as que xa hai.

Unha WebQuest sobre WebQuest

Un bo xeito de aproximarse ao coñecemento das WQ é realizando unha WebQuest que analiza distintas WebQuest.

Merece a pena facela unha vez examinada a información das anteriores entradas.

Por que empregar WebQuest

| View | Upload your own

Como deseñar unha WebQuest

| View | Upload your own

As tarefas das WebQuest

| View | Upload your own

WebQuest: AVENTURAS na web

De xeito moi rápido podemos definir as WebQuest (WQ) dicindo que non son máis que actividades de aprendizaxe que os estudantes levan a cabo empregando recursos de internet preseleccionados polo docente, de xeito que o alumnado enfoque o seu esforzo na utilización deses recursos e non na súa busca. Sen embargo a súa filosofía de aprendizaxe significativa e colaboracionista fai que a tarefa de definir exactamente unha WQ sexa moito máis extensa. Tentaremos facelo repasando como debe ser a súa estructura tanto interna (o seu "espíritu") como externa (o seu "físico").

As WQ están deseñadas para que o alumno desenrole habilidades esenciais para empregar a información, é dicir, para clasificala, organizala, analizala e sintetizala correctamente, co obxectivo de xerar un producto novo que cumpra os fins da aprendizaxe plantexada.

A súa invención e difusión débese a Bernie Dodge (Profesor de Tecnoloxía Educativa - Universidade Estatal de San Diego) quen, case por casualidade, aló por 1995 ao ver o resultado da busca, recopilación e reelaboración da información por parte dos seus estudantes fixou a idea básica da estructura das WQs.

Estructura
Unha WQ debe ter os seguintes apartados para o alumnado:

Introducción
Tarefa
Proceso (onde se inclúen os recursos)
Avaliación
Conclusión

Ademais debera sempre incluír un apartado de créditos e unha páxina para o profesor.

Vexámolos aquí con máis detalle e teñamos en conta os seguintes puntos para distinguir unha verdadeira webquest.

As TICs nas nosas aulas

En Galicia non existe un espazo consolidado destinado a que o profesorado ou o alumnado cre e comparta información, actividades ou experiencias na nosa lingua. Nos últimos anos a Consellería de Educación ou proxectos independentes como Lapis de cores ou Edugaliza, danos a posibilidade de ter sitios que están centrados na recopilación de contidos didácticos.

O proxecto Lanzadeira permitiría ao profesorado e ao alumnado navegar pola información da nosa lingua, crear actividades didácticas, desenvolver canles de comunicación entre o profesorado, compartir materiais integrando voz, texto, imaxes, e a interactividade propia da internet. Alguén da Consellería, que seguro que sabe moito máis que os docentes que traballaron nese proxecto, decidíu que non valía a pena e agora descansa gardado nunha papeleira ou, como mal menor, nun caixón dalgún despacho lonxe dos centros educativos.

Cómpre pór a andar novos proxectos que palíen estas carencias, espazos que aproveiten ao máximo todas as posibilidades da comunicación multimedia, facendo das propostas e metodoloxías didácticas a súa razón de ser.

Os compoñentes dun Proxecto de Formación en Centros (PFAC) do CPI Monte Caxado (As Pontes) iremos relatando neste blogue, conforme vaiamos aprendendo, os recursos que se poden empregar para introducir as TICs nas nosas aulas.

Parte deste texto foi extraído do número 38 da Revista Galega de Educación de NOVA ESCOLA GALEGA que trata sobre a Competencia Dixital